Monday, June 29, 2009

മരം പെയ്തത്..!!


നീ ഒരു മഴ മേഘമായിരുന്നു.!!
എന്നാല്‍ ഇപ്പോള്‍ നീ
വെളുത്ത പൂക്കള്‍ നിറഞ്ഞ
ഒരു പൂമരമാണ്...!!

മഴ തോര്‍ന്നിരിക്കുന്നു.
എങ്കിലും
മരം പെയ്യുമ്പോള്‍
ഞാനിപ്പൊഴും
മഴ നനയാറുണ്ട്.

............

Wednesday, June 10, 2009

രണ്ട് അരക്കവിതകള്‍.


1.തേള്‍

എന്റെ പകയും
വേദനയും
വിഷാദവും
ഒരുക്കിവെച്ചിട്ടുണ്ട് ഞാന്‍
വാലിന്റെ തുമ്പത്ത്
ഒരൊറ്റ തുള്ളി വിഷമായി.

എന്നോട് കളിക്കല്ലേ,
നിന്റെ സ്വപ്നങ്ങളില്‍
വിഷനീല പടര്‍ത്തും ഞാന്‍
ഒറ്റ കുത്തുകൊണ്ട്.

====================

2.ബബിള്‍ഗം

കടിച്ച് നീരിറക്കി
ചവച്ചു തുപ്പുന്നതിനു മുമ്പായി
ഊതിവീര്‍പ്പിച്ചതായിരുന്നു.
ഒരു കുമിളയായി
പൊട്ടിത്തീര്‍ന്നില്ല-

പിന്നെയും ഒരു ചുംബനമായി
ചുണ്ടിനു ചുറ്റും
പടര്‍ന്നും പിന്നെ അടര്‍ന്നും.

====================

Saturday, March 28, 2009

ജനറേഷന്‍..!!

സുന്ദരമായ സ്ഫടികഭിത്തികല്‍ക്കിടയിലൂടെ കൗതുകത്തോടെ തുഴഞ്ഞു നീന്തിക്കൊണ്ട് കുഞ്ഞ് മീന്‍ അമ്മ മീനിനോട് പറഞ്ഞു: " ഈ അക്വേറിയം എത്ര സുന്ദരമാണ്..!!"
മുകളിലേക്ക് ഉയര്‍ന്നുപൊങ്ങി പൊട്ടിച്ചിതറുന്ന വായു കുമിളകള്‍ക്കു കീഴില്‍ ഒരു കൃത്രിമ മുത്തുച്ചിപ്പിക്കു മുകളില്‍ നിന്ന് അമ്മമീന്‍ അപ്പോള്‍ കടല്‍ സ്വപ്നം കാണുകയായിരുന്നു.